នគរបាលខេត្ដកណ្ដាលសហការជាមួយមន្ដ្រីស៊ីម៉ាក់ចុះប្រមូលគ្រាប់យុទ្ធភ័ណ្ឌមិនផ្ទះចំនួន៣គ្រាប់នៅស្រុកល្វាឯម
30-April-2018 | ដោយ ពលមនសិការ
កណ្ដាល ៖ គ្រាប់យុទ្ធភ័ណ្ឌពុំទាន់ផ្ទុះចំនួន៣គ្រាប់ត្រូវបានសមត្ថកិច្ចនគរបាលខេត្ដកណ្ដាលសហការជាមួយមន្ដ្រីជំនាញនៃមជ្ឈមណ្ឌលសកម្មភាពកំចាត់មីនកម្ពុជា ប្រមូលចេញពីស្រុកល្វាឯម នៅថ្ងៃទី២៩ ខែមេសា ឆ្នាំ២០១៨ ដើម្បីយកទៅធ្វើការកំទេចចោលតាមជំនាញបញ្ជាសការគ្រោះថ្នាក់ដល់ប្រជាពលរដ្ឋ ។
មន្ដ្រីនគរបាលខេត្ដកណ្ដាលបានឲ្យដឹងថា បន្ទាប់ពីទទួលបានព័ត៌មានថា នៅភូមិសាស្ដ្រស្រុកល្វាឯមមានបន្សល់នូវគ្រាប់យុទ្ធភ័ណ្ឌមិនទាន់ផ្ទុះពីសម័យសង្គ្រាមក្នុងទសវត្សឆ្នាំ៧០រួចមក នៅថ្ងៃអាទិត្យ ទី២៩ ខែមេសា ឆ្នាំ២០១៨ សមត្ថកិច្ចនគរបាលគ្រប់គ្រងអាវុធ គ្រឿងផ្ទុះនិងជាតិពុល នៃស្នងការដ្ឋាននគរបាលខេត្ដកណ្ដាល សហការជាមួយមន្ដ្រីជំនាញនៃមជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា CMAC ចុះធ្វើការរំដោះយកគ្រាប់យុទ្ធភ័ណ្ឌមិនទាន់ផ្ទុះចំនួន៣គ្រាប់។
ប្រភពដដែលបន្ដថា បន្ទាប់ពីរំដោះយកចេញបានដោយសុវត្ថិភាពរួចមកគ្រាប់យុទ្ធភ័ណ្ឌមិនទាន់ផ្ទុះទាំង៣នេះ ត្រូវបានមន្ដ្រីជំនាញស៊ីម៉ាកនាំយកទៅរក្សាទុកនៅអង្គភាពដែលមានទីតាំងនៅឯខេត្ដកំពង់ឆ្នាំង រងចាំធ្វើការកំទេចចោលតាមជំនាញ ៕
ចំនួនអ្នកទស្សនា
- ថ្ងៃនេះ231
- ម្សិលមិញ10851
- សប្តាហ៍នេះ66751
- ខែនេះ181901
- ឆ្នាំនេះ181901
- សរុប20624357